Nou konprann li kapab konplike pou w konprann nan ki sikonskripsyon w ap viv Nouyòk ak ki kandida ki nan kous elektoral la. Nan gid sa a, w ap jwenn tout enfòmasyon ou dwe konnen soti nan fason pou w anrejistre pou w vote, rive sou ki sèvis ki disponib pou fasilite moun ki gen pwoblèm andikap ak sila yo ki pa pale anglè vote. Vote NYC reponn lòt kesyon ou ka genyen sou eleksyon yo.
Kèk dat enpòtan
Dènye dat pou w anrejistre pou w vote se 26 Oktòb 2024
Dat pou w vote anvan jou eleksyon yo ap kòmanse 26 oktòb pou rive 3 novanm 2024
Jou eleksyon yo se Madi 5 novanm 2024
Pou w jwenn plis enfòmasyon sou kijan pou w aplike pou w vote pi bonè ak fason pou w vote si w ap absan, ale sou sit New York Board of Elections (NYSBOE) la.
W ap jwen bon jan enfòmasyon tou sou fason pou w vote anvan jou eleksyon yo ak fason ou kapab vote si w pap la sou sit NYC Votes la.
Pouw jwenn sant kote w ap vote a
Chache sant vòt ou a la a. Si w ap vote anvan jou eleksyon yo, sant vòt la kapab diferan ak kote w ap vote nan jou eleksyon yo.
Kijan pou w anrejistre pou w vote
Ou kapab anrejistre pou w vote an pèsòn, sou entènèt, oubyen pa mwayen lapòs. Konsèy elektoral vil Nouyòk la (NYCBOE) mete tout detay yo disponib pou ou l a a.
Men kondisyon pou w anrejistre pou w kapab vote Nouyòk:
- Fòk ou se sitwayen Ameriken. Moun ki fèt Pòtoriko yo, Gwam ak Zile Vyèj yo kapab vote tou.
- Fòk ou t ap viv Nouyòk depi 30 jou pou pi piti.
- Ou pa dwe kapab revandike dwa pou w vote okenn lòt kote apre Nouyòk.
- Ou pa dwe nan prizon pou yon krim.
- Fòk yon tribinal pa deklare w mantalman enkapab.
- Ou dwe genyen omwens 18 ane anvan jou eleksyon yo.
- Yon moun ki genyen omwens 16 ane epi ki kalifye pou vote kapab pre-anrejistre pou l kapab vote. Konsa, l ap otomatikman anrejistre pou l vote lè l genyen 18 tan.
Ou kapab tcheke estati anrejistreman w la a.
Kijan pou w anrejistre pou w vote
Men dokiman w ap ka itilize pou w anrejistre: nimewo pèmi kondui w, nimewo kat idantite w oubyen 4 dènye chif nimewo sekirite sosyal ou.
Yon moun ki anrejistre pou l vote pap gen pou l montre pyès idantite l pou l vote, sèlman si li pa t bay detay sou idantite l lè l t ap anrejistre a.
Moun k ap vote pou premye fwa yo oblije bay dokiman idantite yo lè y ap anrejistre pou yo vote. NYCBOE fè konnen, si w pa gen yon dokiman idantite jou eleksyon an, w ap toujou kapab vote sou baz yon deklarasyon ekri ki fèt devan yon otorite lajistis oubyen yon notè.
Si ou pa genyen 4 dènye chif nimewo sekirite sosyal ou, ni pèmi kondui w pou w mete nan fòmilè anrejistreman an, ou kapab mete yon kopi dokiman sa yo:
- Yon kat idantite ki genyen foto w ladan l
- Papye bil ki fèt sou non w
- Yon atestasyon labank
- Yon chèk travay ou oubyen leta ba ou
- Yon dokiman leta ki genyen non w ak adrès ou ladan l
Kijan moun lajistis kondane yo kapab vote?
- Moun ki komèt yon deli kapab vote menm si yo nan prizon.
- Si w komèt yon deli epi w nan prizon oubyen w ap tann desizyon lajistis, ou kapab vote.
- Yon moun ki nan prizon pou krim pap kapab vote. Men, li kapab vote si tribinal la kanpe santans li.
- Si w soti nan prizon apre w fin pase santans ou akoz yon krim, ou kapab vote. Men, fòk ou re-anrejistre.
- Si ou genyen yon kondanasyon deferal oubyen yon kondanasyon nan yon lòt eta, w ap toujou kapab vote Nouyòk.
- Moun lajistis plase nan libète kondisyonèl oubyen ki sou siveyans gen dwa pou yo vote.
La a , w ap jwenn plis enfòmasyon sou kijan moun ki gen dosye krim nan lajistis yo kapab vote.
Konprann bilten vòt la
Ale sou Ballotpedia pou w wè kijan yon modèl bilten vòt fèt. Sit la ap montre w dimansyon bilten an, ak ki kandida ki nan eleksyon nasyonal yo, pou eta yo ak pou eleksyon lokal yo.
Konprann sikonskripsyon w ap viv la
Gen plizyè kalite sikonskripsyon (district an anglè) nan eta Nouyòk la: Genyen ki pou kongrè (Congressional an anglè), pou sena eta a (State Senate an anglè) ak asanble eta a (State Assembly district an anglè). Sa vle di, yon kay pozisyone l nan twa sikonskripsyon.
Sikonskripsyon pou Kongrè
Sikonskripsyon pou kongrè yo la pou eli manm ki nan Kongrè Ameriken an. Chak 10 ane, yo redefini sikonskripsyon sa yo sou baz resansman jeneral yo. Genyen 22 sikonskripsyon pou kongrè nan eta Nouyòk la. Pou kounye a, Chuck Schumer ak Kirstin Gillibrand se 2 senatè ki eli pou reprezante eta a. Senatè Gillibrand retounen kòm kandida pou menm pòs la. W ap jwenn plis detay sou eleksyon sa la a.
Sikonskripsyon pou sena eta Nouyòk la
Sikonskripsyon pou sena yo la pou eli manm sena eta Nouyòk la. Genyen 63 sikonskripsyon pou Sena a nan Nouyòk. W ap jwenn plis enfòmasyon la a, sou eleksyon sa yo.
Sikonskripsyon pou asanble eta Nouyòk la
Sikonskripsyon sa yo la pou eli manm asanble eta Nouyòk la. Genyen 150 sikonskripsyon pou asanble eta Nouyòk la. W ap jwenn plis enfòmasyon sou eleksyon pou asanble a la a.
Konnen sikonskripsyon pou w vote a
Fason ki pi fasil pou w jwenn sikonskripsyon pa w la, se pou w antre adrès kay ou sou sit Ballotpedia a. Konsa w ap jwenn tout sikonskripsyon pa w yo, ak ki moun ki kandida pou chak sikonskripsyon.
Enfòmasyon sou aksè nan sant vòt yo
Daprè Vote 411, pifò sant vòt yo genyen aksè moun moun ki sou chèz woulant yo. Men, Enstisyon pou endepandans moun k ap viv ak andikap yo di “pou yon moun k ap viv ak andikap rive nan pòt yon sant vòt nan katye l se yon gwo defi.”
Menm si ou menm oubyen yon pwòch ou ap viv ak andikap oubyen pa pale anglè, dwe genyen moun ki la pou ede w vote. W ap jwenn plis detay sou sa la a.
Genyen aparèy pou make bilten vòt yo nan tout sant vòt yo. Sa a ede moun ki pa wè byen yo ak sila ki pa kapab itilize yon plim pou ekri. Aparèy sa yo pèmèt moun nan tande kandida li vle chwazi yo nan yon kas, l ap kapab tradui bilten an nan lòt lang, oubyen li kapab gade l sou yon ekran. Genyen kat fason diferan aparèy sa yo pèmèt ou ekri sou yon bilten.
W ap jwenn plis detay sou sa, sou sit NYCBOE a.
Moun ki pap prezan jou eleksyon yo ap kapab aplike pou jwenn bilten vòt yo la a.
Daprè lalwa Nouyòk, tout materyèl vòt yo dwe disponib nan kèk sant vòt nan lang Bengali, Koreyen, Espanyòl ak Chinwa. Gen entèprèt ki disponib nan kèk sant vòt pou moun ki pale Arab, Ris, Kreyòl Ayisyen ak Yidich. W ap jwenn ki sant ki bay sèvis tradiksyon sa yo la a.
Moun ki bezwen asistans pou lang yo pale, kapab mache ak entèprèt yo. W ap jwenn plis enfòmasyon la a.
Ki kandida ki nan eleksyon nasyonal yo?
Pou laprezidans
Donald J. Trump ak Kamala Harris se kandida pou prezidan nan eleksyon mwa novanm yo. Gen lòt kandida endepandan tankou Cornell West ak Jill Stein. W ap jwenn plis enfòmasyon la a.
Pou Sena Ameriken an
Genyen senatè Kirsten Gillibrand (Demokrat) k ap anfas Mike Sapraicone (Repibliken) ak kèk lòt kandida endepandan. W ap jwenn plis detay la a.
Pou chanm depite a
Kandida pou eleksyon sa a depann de sikonskripsyon w ap viv la. Sonje w ap jwenn distri pa w la la a. Lè w fin jwenn sikonskripsyon an, w ap jwenn enfòmasyon sou kandida yo, la a.
Ki moun ki sou bilten pou eleksyon nan eta Nouyòk
Sena Eta Nouyòk la
Kandida pou pòs sa a depann de sikonskripsyon w ap viv la a. Sonje w ap jwenn distri pa w la la a. Lè w fin jwenn sikonskripsyon an, w ap jwenn enfòmasyon sou kandida yo, la a.
Asanble Eta Nouyòk la
Kandida pou pòs sa a depann de sikonskripsyon w ap viv la a. Sonje w ap jwenn distri pa w la la a. Lè w fin jwenn sikonskripsyon an, w ap jwenn enfòmasyon sou kandida yo, la a.
Eleksyon lokal yo
An fonksyon de kote w ap viv la, gendwa genyen eleksyon lokal. Pa ekzanp, moun ki Brooklyn kapab vote pou yo eli yon moun nan tribinal sivil New York City Civil Court Kings County 6th Municipal Court district.
W ap kapab wè pou ki pòs w ap kapab vote lè w antre adrès ou la a. W ap kapab mande yon bilten ki gen tout detay yo, konsa w ap kapab wè ki eleksyon ki genyen pou zòn w abite a.
Amandman Egalite anba pwoteksyon lalwa eta Nouyòk
Sa a se yon amandman nan konstitisyon an.
Pou kounye a, konstitisyon eta Nouyòk la entèdi diskriminasyon ki chita sou ras, koulè po, kwayans ak relijyon.
Lè w chazi “yes” nan amandman an, l ap mete “ras, peyi moun nan fèt la, laj, ak andikap”, oubyen “sèks moun nan, sa genyen ladan l idantite ki baze sou “jan”( sètadi fason moun nan konsidere tèt li), si moun nan ansent, sante repwodiktiv” kòm bagay ki pwoteje kont diskriminasyon.
W ap jwenn plis enfòmasyon sou Ballotpedia la a.
Epi tou, Associated Press gen repòtaj sou sa. W ap jwenn li la a.
Vèsyon orijinal gid sa a te pibliye sou Epicenter NYC. Se Ralph Thomassaint Joseph ki tradui l.
