Pou w travay kòm anplwaye Etazini, ou dwe gen yon otorizasyon travay ki valab. Lalwa egzije patwon yo ranpli fòm I-9 la pou yo verifye si moun y ap anplwaye yo gen dwa travay legalman. Imigran ak lòt moun ki vle fè lajan lè yo lanse pwòp biznis yo oswa fè ti djòb endepandan gen kèk opsyon ki disponib pou yo.
Enfòmasyon ki nan gid sa a se sèlman pou bay enfòmasyon. Yo pa reprezante konsèy legal. Pale ak yon avoka pou w konnen si youn nan opsyon sa yo ka afekte estati oswa dosye imigrasyon w.
Ki diferan kalite travay mwen ka jwenn?
Travay tradisyonèl yo ka fèt a tan plen oswa a tan pasyèl. Kalite travay sa yo bay yon salè ki fiks, epi pafwa yo vini ak lòt avantaj tankou asirans sante oswa konje peye.
Pou w travay a tan plen oswa a tan pasyèl, ou dwe pase nan yon pwosesis aplikasyon epi pafwa yon verifikasyon dosye kriminèl. Sa vle di, ou bezwen gen yon otorizasyon travay ki valab ak yon pyès idantite pou w ka ranpli epi soumèt fòm I-9 la.
Travay sou kontra pi fleksib pase yon travay tradisyonèl, men w toujou gen kèk dokiman pou w ranpli, tankou fòm 1099 la. Nan kalite travay sa a, yo pa konsidere w kòm yon anplwaye, epi an jeneral, ou pa resevwa avantaj tankou asirans sante. Men, ou gen plis libète pou w fikse tarif ou ak defini kalite travay ou pral fè.
Ki kote mwen ka jwenn yon travay a tan plen oswa a tan pasyèl?
Si w gen yon otorizasyon travay epi w ap chèche yon travay tradisyonèl, sit entènèt ki pibliye òf travay yo ka ede w jwenn travay a tan plen oswa a tan pasyèl. Anba a, w ap jwenn yon lis sit ansanm ak yon ti eksplikasyon sou kalite travay ou ka jwenn sou chak ladan yo:
- Indeed: Pou w jwenn travay nan òganizasyon kominotè, òganizasyon filantwopik, ak ajans gouvènman.
- NY State Department of Labor Search Board: Pou w chache travay, fè rechèch sou karyè, epi jwenn pwogram fòmasyon espesyalize nan Eta Nouyòk.
- Jobs NYC: Pou w jwenn travay nan gouvènman vil Nouyòk epi resevwa asistans pèsonalize pou chache travay.
- ZipRecruiter: Pibliye plizyè kalite opòtinite travay.
- LinkedIn: Yon rezo sosyal pwofesyonèl ki pèmèt ou chache travay tou.
- Monster: Pibliye plizyè kalite òf travay.
- Idealist: Pou w jwenn travay nan òganizasyon yo.
- New York City Green Jobs: Pou w jwenn travay nan vil Nouyòk ki konsantre sou anviwònman, chanjman klimatik, ak devlòpman dirab.
- Building Skills NY: Yon òganizasyon nan sektè konstriksyon ki ede moun nan Nouyòk ki pa gen travay jwenn fòmasyon ak opòtinite travay nan konstriksyon.
Ou ka jwenn fòmasyon pou travay, èd pou prepare CV, ak sipò pou devlope karyè w atravè NYC Small Business Services. Ajans sa a gen sant karyè nan senk gwo zòn vil Nouyòk yo — Bronx, Brooklyn, Manhattan, Queens ak Staten Island — kote w ka jwenn konsèy pèsonalize sou karyè, koneksyon ak opòtinite fòmasyon, konsèy pou entèvyou travay, ak lòt sèvis ankò.
Ki kote mwen ka jwenn travay sou kontra?
Si w enterese fè travay sou kontra oswa ti djòb endepandan, gen plizyè sit entènèt ou ka itilize pou w jwenn kalite opòtinite sa yo.
Men yon lis sit ansanm ak yon ti eksplikasyon sou sa chak ladan yo ofri:
- Taskrabbit: Sou sit sa a, ou ka enskri pou w jwenn travay peye tankou fè ti reparasyon nan kay, ede moun demenaje, ak lòt kalite travay. Klike nan lyen sa a pou w aprann plis sou pwosesis la epi kreye yon pwofil.
- Care.com: Yon sit kote w ka enskri pou w jwenn travay nan gad timoun, swen bèt nan kay, oswa asistans pou granmoun aje. Klike nan lyen sa a pou wè kijan pou w kreye yon pwofil.
- Upwork.com: Yon platfòm kote w ka jwenn travay sou kontra nan plizyè domèn tankou konsepsyon grafik, administrasyon ak sèvis kliyan, ekriti, ak tradiksyon. Klike nan lyen sa a pou w wè kijan pou w enskri.
- Wag!: Yon sit kote w ka touche lajan pou w pwomennen chen oswa pran swen yo. Klike nan lyen sa a pou wè kijan pou w enskri.
Ou ka vizite sit Immigrants Rising pou w jwenn plis videyo ak gid sou fason yon imigran ka fè lajan. Yo gen resous sou plizyè sijè, tankou kijan pou w lanse yon biznis, travay kòm kontraktè endepandan, oswa prepare yon plan biznis.
Èske mwen dwe peye taks sou lajan mwen touche nan travay sou kontra?
Kèlkeswa fason w chwazi pou w fè lajan, ou dwe prepare w pou w peye taks sou lajan w touche a.
