Ak kantite nouvo ka Covid-19 ki genyen Etazini pandan ete a, CDC rekòmande pou tout moun ki genyen pou pi piti 6 mwa laj, pou yo pran nouvo dòz vaksen Covid-19/ 2024-2025 lan. Se yon fason pou pwoteje moun kont risk ki genyen, menm si ou pran vaksen Covid-19 la deja.
Ki moun ki ta dwe pran nouvo dòz vaksen Covid-19 la?
Covid-19 se yon epidemi ki toujou ap evolye, e, pwoteksyon ansyen vaksen yo ba w la ap bese plis tan ap pase. Nouvo dòz vaksen COVID-19/ 2024-2025 lan fèt pou pwoteje w kont nouvo varyan epidemi an, ki lakoz enfeksyon epi voye anpil moun al entène lopital. Lè w pran yon nouvo dòz, sa redui chans pou w malad anpil oubyen pou ale lopital akoz Covid-19 la. Li ede tou diminye risk ki genyen pou devlope sa yo rele “Covid-19 long lan”, yon sistiyasyon kote sentom yo kapab dire plizyè mwa apre premye enfeksyon an.
Moun ki resevwa dòz vaksen COVID-19/ 2023-2024 yo gen pi bon pwoteksyon kont maladi grav pase sila yo ki pa pran l yo.
Èske mwen elijib pou nouvo dòz la?
Wi! Tout moun ki genyen pou pi piti 6 mwa laj elijib pou pran vaksen COVID-19 ki ajou, kèlkeswa kote ou rete, sitiyasyon imigrasyon w oswa kouvèti asirans ou. Ou pa bezwen gen sitwayènte ameriken oswa asirans sante pou resevwa vaksen an.
Ki kote mwen ka jwenn vaksen COVID-19 ki ajou nan vil Nouyòk?
Si ou pa gen asirans oswa ou se yon imigran iregilye, men kèk kote nan vil Nouyòk kote w ap ka pran vaksen an gratis:
NYC Health + Hospitals Facilities
Lopital ak klinik piblik vil Nouyòk yo bay vaksen COVID-19 gratis pou tout moun, pami yo, imigran iregilye yo oswa ki pa gen asirans. Sant sa yo an sekirite gen bon akèy pou tout moun.
Vizite sit entènèt NYC Health + Hospitals yo pou w jwenn yon kote ki pre w.
Sant Sante Kominotè HRSA finanse yo
Sant sa yo bay swen lasante pa rapò ak revni w epi kantite moun ki nan fanmi w. Si w pa gen mwayen pou w peye, y ap toujou ba w vaksen an gratis. Imigran iregilye yo ap jwenn sèvis tou. W ap jwenn yon sant sante ki pre w sou lyen sa a.
NYC Vaccine Finder
Ou kapab itilize sit NYC Vaccine Finder a pou w jwenn yon sant ki bay vaksen ki pre w. Ou ka filtre rechèch la pou jwenn kote ki ofri vaksen gratis, oubyen a pri ki ba, espesyalman pou moun ki pa gen asirans yo. Anpil nan sant sa yo pa bezwen asirans. Vizite NYC Vaccine Finder la a.
Li enpòtan pou w sonje, depi lè leta federal sispann finanse pwogram vaksen nan famasi yo, vaksen COVID-19 yo pa disponib gratis ankò nan famasi tankou CVS pou moun ki pa gen asirans yo.
Amy Thibault, Direktè Direktè Kominikasyon Ekstèn nan CVS Pharmacy di: “Kòm nou konnen, Pwogram CDC’s Bridge Access la ki te bay granmoun ki pa gen asirans yo vaksen COVID-19 gratis la te fini. Pandan CVS pa bay vaksen COVID-19 gratis ankò, pasyan yo ka tcheke depatman sante lokal yo pou wè si yo ofri sèvis la gratis oswa a yon pri ki ba,”.
Kilè vaksen COVID-19 ki ajou a ap disponib nan sant sa yo?
Vaksen COVID-19/ 2024-2025 yo disponib kounye a apre FDA te fin apwouve vaksen Pfizer, Moderna ak Novavax la. Konpayi ki fè vaksen yo ap voye yo dirèkteman bay founisè swen sante ak famasi yo. Plizyè sant sante ta dwe kòmanse resevwa vaksen nan kòmansman jiska mitan mwa septanm.
Ap genyen mizajou ki fèt sou sit NYC Vaccine Finder a ak kote w ap konnen ki bò ou ka pran nouvo vaksen an lè li disponib. Ou ka kontakte founisè swen sante w la tou pou w tcheke lè yo pral pare vaksen an.
Èske gen akonpayman ki disponib pou moun ki pa pale angle nan sant vaksinasyon sa yo?
Sant vaksinayon vil Nouyòk la jere sitiyasyon satankou sant NYC Health + Hospitals ak sant Fort Greene Health Center, yoofri sèvis tradiksyon an kreyòl.
Pou plis enfòmasyon sou vaksen COVID-19 ki ajou yo, ou ka vizite paj Vaksen COVID-19 Depatman Sante Vil Nouyòk la.
Ki dokiman mwen bezwen pou m pran vaksen kont COVID-19 la?
Yon kat idantite pa obligatwa pou pran vaksen an.
Tout moun k ap viv Etazini elijib pou resevwa sèvis COVID-19 gratis, tankou vaksen, tès, ak tretman, menm si ou pa gen asirans, e kèlkeswa estati imigrasyon w. Ou pa bezwen yon Nimewo Sekirite Sosyal oswa yon kat idantite gouvènman an pou w resevwa sèvis COVID-19 yo gratis.
Lòt enfòmasyon pou imigran iregilye yo ak moun ki pa gen asirans
Ou pa gen okenn obligasyon pou w pataje estati imigrasyon w lè w ap pran vaksen COVID-19 la. Sant vaksinasyon yo p ap rapòte w bay otorite imigrasyon yo, epi enfòmasyon sou ou ap rete konfidansyèl. Vil Nouyòk angaje l pou l asire tout moun, kèlkeswa estati imigrasyon yo, pou yo gen aksè a swen sante, tankou vaksen COVID-19 la.
Se Ralph Thomassaint ki tradui gid sa a.
Nou envite w gade videyo sa a, pou w konnen tout resous Documented genyen pou ou.
