Vil Nouyòk gen plizyè sèvis gratis pou fasilite moun ki abite nan vil la ranpli dosye taks yo. Platfòm NYC Free Tax Prep la la pou ede w jwenn yon maksimòm ranbousman, epi evite w fè erè ki kapab koute anpil lanjan, kit ou ranpli taks pou tèt ou, pou fanmi w oubyen kòm yon moun ki travay poukont li.
Platfòm vil Nouyòk la ap konekte w ak pwofesyonèl IRS ki sètifye k ap ede w ranpli dosye taks ou yo. Delè pou w ranpli taks ou yo ane sa a, se 15 avril 2025.
Pwogram nan disponib pou tout moun k ap viv Nouyòk, kèlkeswa estati imigrasyon yo. Sèvis preparasyon taks yo gratis ak konfidansyèl, yon fason pou garanti vi prive w ak sekirite w. Si w se yon imigran san papye, li konseye pou w ranpli taks ou, menm si travay ou peye w ak lajan kach.
Nan plas yon nimewo sekirite sosyal (SSN), ou ka itilize yon nimewo idantifikasyon endividyèl (ITIN) pou w ranpli taks ou yo epi jwenn kèk benefis si w elijib pou yo.
Si pou ane 2024 la, kay w ap viv la pa fè plis pase 93 000 dola, oubyen si w selibatè epi revni w pa depase 65 000 dola pou ane a, ou elijib pou w itilize pwogram Free Tax Prep vil Nouyòk la pou w ranpli taks ou gratis.
Moun k ap travay poukont yo ki depanse pou pi go 250,000 dola nan biznis yo ka resevwa asistans espesyalize an pèsòn nan yon biwo ou gen libète pou w chwazi.
NYC Free Tax Prep ofri kat fason pratik pou w ranpli taks ou gratis atravè pwogram Asistans taks sou revni volontè ak konsèy taks pou granmoun aje (VITA/TCE).
- Virtual Tax Prep: Yon preparatè taks ka ede w ranpli taks ou gras ak yon apèl telefòn k ap dire ant 60 a 90 minit.
Pou w patisipe, ou bezwen swa yon òdinatè, yon tablèt, oswa yon telefòn entèlijan ki gen yon bon koneksyon entènèt ak kapasite pou telechaje yon lojisyèl videyo konferans ki sekirize.
W ap jwenn yon volontè VITA/TCE IRS sètifye k ap ede w ranpli deklarasyon taks ou pandan yon sesyon vityèl. L ap reponn nenpòt kesyon w genyen ki gen rapò ak taks.
Chanm Komès Nwa vil Nouyòk la ofri sèvis preparasyon taks gratis lendi, madi ak vandredi soti 10:30 a.m. rive 5 p.m.. Sèvis yo disponib an anglè, panyòl, mandaren, kreyòl ayisyen, bengali ak koreyen. Pou w jwenn asistans, rele nan nimewo: 718-255-3322.
BronxWorks ofri preparasyon taks gratis lendi soti 10 a.m. rive 1 p.m., jedi soti 9 a.m. rive 1 p.m., ak vandredi soti 11 a.m. rive 5 p.m.. Sèvis yo disponib an anglè ak nepalè. W ap jwenn plis enfòmasyon sou bronxworkstaxes.as.me.
- Assisted Self-Prep: Ranpli deklarasyon taks ou poukont ou. Yon preparatè ap disponib nan telefòn oswa sou imèl pou reponn kesyon w yo.
Moun ki vle ranpli taks yo ap bezwen yon òdinatè, yon tablèt oswa yon smartphone ki gen bon koneksyon entènèt ki estab, yon adrès imèl, ak revni AGI 2023 yo, oubyen PIN yo chwazi a.
Men founisè asistans preparasyon yo:
Ariva ofri sèvis jou madi soti 10 a.m. rive 5 p.m. an anglè ak espanyòl. Pou w benefisye sèvis yo, revni w pandan ane a pa dwe depase 84 000 dola. Ou ka jwenn plis detay sou tax.ny.gov/tap/calendars/bookings-ariva.htm.
COJO Flatbush ofri asistans gratis pou preparasyon taks lendi ak mèkredi soti 9 am rive 8 pm, madi ak jedi soti 9 am rive 5 pm, vandredi soti 9 am rive 1 pm, ak dimanch soti 12 pm. rive 5 p.m.
Sèvis yo disponib an kreyòl Ayisyen, anglè, espanyòl, ak plizyè lòt lang. Pou w benefisye sèvis yo, revni w pandan ane a pa dwe depase 65 000 dola si w pa gen moun ki depann de ou. Si w gen moun ki depann de ou, revni w pandan ane a pa dwe depase 93 000 dola. Pou w jwenn sèvis yo, rele 718-377-2900 Ext. 331.
Fedcap-SingleStop travay lendi rive vandredi soti 10 a.m. rive 4:30 p.m. an anglè, espanyòl, ak kreyòl Ayisyen. Limit revni pou yo ba w sèvis se 84 000 dola oswa mwens. Vizite singlestop.org/how-to-make-an-appointment pou w jwenn plis detay.
Grow Brooklyn ofri sèvis preparasyon taks gratis soti lendi jiska vandredi apati 6 p.m. Yo ofri sèvis yo an kreyòl Ayisyen, anglè, espanyòl ak plizyè lòt lang. Pou w benefisye sèvis yo, revni w pandan ane a pa dwe depase 65 000 dola si w pa gen moun ki depann de ou. Si w gen moun ki depann de ou, revni w pandan ane a pa dwe depase 93 000 dola. Pou w jwenn sèvis yo, rele 718-377-2900 Ext. 331. Gen plis enfòmasyon ki disponib sou sit growbrooklyn.org/self-file/.
LaGuardia Community College ofri sèvis jou jedi soti 10 a.m. rive 5 p.m. an anglè ak espanyòl. Pou w benefisye sèvis yo, revni w pou ane a pa dwe depase 84 000 dola. W ap jwenn plis detay sou laguardia.edu/cares/.
Medgar Evers College bay asistans jou vandredi soti 9 a.m. rive 4 p.m. an anglè ak an espanyòl. Pou w benefisye sèvis yo, revni w pou ane a pa dwe depase 84 000 dola. Vizite tax.ny.gov/tap/calendars/bookings-medgar-evers.htm pou w jwenn plis detay.
Eta Nouyòk pral ofri sèvis jou mèkredi soti 9 a.m. rive 4 p.m. an anglè ak espanyòl. Pou w benefisye sèvis yo, revni w pou ane a pa dwe depase 84 000 dola. W ap jwenn plis enfòmasyon sou sit tax.ny.gov/tap/calendars/bookings-statewide-virtual-session.htm.
Sèvis depoze dokiman taks ou yo: Depoze dokiman taks ou yo kote w ap fè deklarasyon taks al gratis epi pran dokiman deklarasyon an pita. Pou w jwenn sit preparasyon taks gratis ki pi pre a, vizite NYC Free Tax Prep Map.
An pèsòn: Vizite yon biwo ki pre w pou w jwenn asistans yon moun prepare taks ou. Pou w jwenn sit preparasyon taks gratis ki pi pre a, vizite NYC Free Tax Prep Map.
Anvan w pran randevou, asire w ou genyen tout dokiman w ap bezwen yo takou:
- Yon dokiman idantite ki genyen foto w (Kat IDNYC bon)
- Nimewo Idantifikasyon Taks (TIN) pou tèt ou, mari oswa madanm ou, ak nenpòt moun ki depann de ou .
- Prèv lajan w antre (ki gen ladan l fòm W-2, 1098, 1099. Oubyen, si w se yon travayè endepandan, bay dosye sou revni ak depans ou yo)
- Depans gadri (si sa aplikab), ki gen ladan l enfòmasyon sou founisè sèvis la ak nimewo anrejistreman taks yo
- Nimewo kont labank ak nimewo kont pou depo dirèk ranbousman yo
- Siyati, si w ap aplike pou ranpli ansanm, siyati mari oubyen madanm obligatwa.
W ap jwenn yon lis dokiman w ap bezwen pou w ranpli taks ou la a.
