Men sa w dwe konnen:
- Moun ki kapab gen yon SSN se: sitwayen ameriken, rezidan pèmanan legal yo ak lòt moun ki pa imigran,tankou moun ki nan pwogram DACA yo, travayè etranje ak kèk lòt moun.
- Yon moun ki bezwen aplike pou yon kat SSN pou premye fwa oubyen ranplase l, kapab fè sa sou entènèt. Moun k ap aplike pou premye fwa yo dwe ale an pèsòn nan biwo sèvis sekirite sosyal la.
- Lè w fin aplike pou yon kat sekirite sosyal, apre yo fin verifye idantite w, kat la ap rive atravè jwenn ou atravè USPS nan yon espas 14 jou ouvrab.
Si yon moun sèvi ak SSN ou san pèmisyon w, yo rele sa vòl idantite. Ou dwe rapòte sa bay Komisyon Federal ak Komès Etazini.
Yon nimewo Sekirite Sosyal (SSN) se yon idantifyan nèf chif Administrasyon Sekirite Sosyal (SSA) bay sitwayen ameriken, rezidan pèmanan ak travayè ki pa imigran men ki elijib yo — tankou moun ki nan pwogram DACA ak travayè H1B yo.
Yo itilize yon SSN pou aplike pou prete lajan, ouvè yon kont labank, jwenn asirans epi deklare salè bay SSA.
Administrasyon Sekirite Sosyal la bay SSN nan nan yon kat papye ki kapab antre nan yon bous. Sa fè li fasil pou w pèdi l, oubyen pou yo vòlè li. Pafwa li pèdi nan men lapòs pandan livrezon. Pandan li enpòtan pou w sonje nimewo a, kat fizik la enpòtan pou w pwouve idantite w lè sa nesesè ak pou anpeche vòl idantite w.
Men kijan pou w ranplase yon kat Sekirite Sosyal ki pèdi oubyen yo vòlè.
Ki moun ki kalifye pou yon SSN?
Nimewo Sekirite Sosyal la pou sitwayen ameriken, rezidan pèmanan legal (LPR) yo ak lòt moun ki pa imigran ki gen ladan l:
- Moun ki gen azil ak refijye yo
- Moun ki pa sitwayen men ki gen otorizasyon travay (pa ekzanp: moun ki nan pwogram DACA, moun ki genyen U Visa)
- Moun ki gen TPS
- Elèv ki gen viza F-1 epi ki elijib pou travay
- Lòt travayè etranje yo gen otorizasyon pou travay Etazini.
- W ap jwenn lis moun ki kalifye yo sou lyen sa a.
Kouman w kapab aplike pou yon SSN?
Moun ki elijib epi ki prezan sou teritwa Etazini ka depoze aplikasyon yo sou entènèt sou sit SSA a. Aplikasyon ap mande w non w, sitwayènte w, dat nesans, peyi w fèt la ak adrès fizik ou. Non an dwe koresponn ak non ki sou dokiman w itilize pou pwouve idantite w yo, tankou paspò w.
Lè w fin aplike sou entènèt, ou dwe pase nan biwo Sekirite Sosyal lokal la nan maksimòm 45 jou pou w bay prèv idantite w. W ap jwenn biwo lokal yo lè w antre kòd postal yo sou sit entènèt SSA a.
Sa a se yon lis dokiman yo aksepte pou w pwouve idantite w. Dokiman yo dwe orijinal, yo pa dwe ekspire epi yo dwe montre non w ak dat nesans ou.
Apre SSA fin verifye idantite w epi li fin ak dosye aplikasyon an, USPS ap remèt kat SSN la pa lapòs nan 14 jou ouvrab.
Moun ki pa imigran ki aplike pou fòm I-765, Aplikasyon pou Otorizasyon Travay, kapab tou mande SSA pou bay yo yon SSN nan menm fòm nan nan seksyon ‘lòt enfòmasyon’ yo.
Mwen pèdi kat Sekirite Sosyal mwen an. Kijan mwen ka ranplase li?
Pa enkyete w, ou pa sèl moun sa rive! Administrasyon SSA a ranplase anviwon 10 milyon kat SSN chak ane, akòz pèt, domaj oswa chanjman non.
Ou ka ranplase yon kat SSN sou sit entènèt SSA a, kote w ap reponn plizyè kesyon, tankou si w konnen nimewo sekirite sosyal ou a, pou yo wè si w kalifye pou ranplase l sou entènèt. Sinon, w ap oblije ale nan yon biwo Sekirite Sosyal an pèsòn.
Yon moun vòlè kat Sekirite Sosyal mwen, kisa m ka fè?
Lè yon moun vòlè epi sèvi ak nimewo sekirite sosyal yon lòt moun, yo rele sa vòl idantite. An 2021, Biwo Estatistik Lajistis la te estime gen 1 moun sou 10 Etazini ki viktim vòl idantite chak ane. Yon moun ka itilize yon SSN pou louvri kont labank, prete lajan, elatriye. Sa kapab gen konsekans grav sou pwen kredi w, ki se yon nimewo Etazini itilize pou mezire byennèt ekonomik ou.
Si w panse ou se viktim vòl idantite, ou dwe rapòte sa bay Komisyon Komès Federal Etazini (FTC) an, kote y ap poze w kesyon sou ensidan an. Ou dwe fè sa prese prese. FTC ap bay asistans pou swiv pwogrè rapò w la ak yon plan rekiperasyon w.
